31 maio 2006

Os Oestrimnios, os Saefes e a Ofiolatría en Galiza

Hoxe, último día do mes de maio, non vou á festa de despedida de actividades extraescolorares do CEIP Pío XII de Santiago. Falto por vez primeira á cita a que ía acudindo dende hai catorce anos, cando aínda estaban alí as pistas de tenis e non existía o polideportivo. No comezo do ano pasado, tralo troco da monitora de iudo, convertinme nos decanos dos monitores das actividades, pero decatábame que xa era hora tamén de ir marchando.
Sospeitando que o curso pasado sería o derradeiro meu alí, soliciteille á ANPA un pequeno dispendio para que tódolos alumnos poideran levar na festa final un pequeno agasallo consistente nun libro de xadrez. A ANPA - como sempre - portouse estupendamente, e merquei para os oito máis pequenos, de seis anos ou menos, o libro "Mate con Tomate" da Editorial Paidotribo e feito pola Escola Luguesa de Xadrez que dirixe o amigo Pablo Castro. E para os vinteoito un pouquiño máis veteráns dirixinme pola mañá de hai xusto un ano ao Servizo de Publicacións da USC onde merquei esa mesma cantidade do primeiro libro de xadrez en galego: "Manual Básico de Xadrez" de XL Veiga Goy e C Arias Iglesias.
Aproveitei a estadía no Servizo de Publicacións para ollar o folleto de libros descatalogados e merquei a prezo de risa unhas cuantas cousiñas: "El léxico de Álvaro Cunqueiro", "Día das Letras Galegas 1992, Fermín Bouza Brey", "La sexualidad femenina en la USC", "El Enriquecimiento sin Causa" ( de Álvarez Caperochipi, profesor de dereito civil cando eu escomenzaba a carreira e compañeiro meu tamén daquela nas clases de alemán na Escola de Idiomas que impartía Rita Radl; dicíase que o departamento de Civil era o do "Caperochipi rojo y el Lete feroz": venceu o Lete, desgraciadamente), e "Os Oestrimnios, os Saefes e a Ofiolatría en Galiza" edición facsimil do libro do ano 1929 do Seminario de Estudios Galegos de Florentino L Cuevillas e Fermín Bouza Brey.
Metín toda a miña compra nunha caixa de cartón.
Na festa, cando correspondeu a miña quenda, agarrei o micrófono e fun lendo o nome de tódolos alumnos para que se achegaran ao cenario e alí unha compañeira da ANPA entregáballes o seu pertinente libro.
O caso é que polo serán, ao chegar a casa e abrir a caixa, descubrín que sobrara un libro de xadrez e que faltaba o dos "Oestrimnios, os Saefes..."
Despois de me sobrepor á vergoña, inquirín pola confusión, e grazas á ANPA poidemos arranxar o malentendido. A damnificada foi unha rapaza de sorriso lindísimo chamada Mariña. Non quero pensar nas facianas de estupor que terían ela e os seus pais aquel día na súa casa pola noite. Nove meses para aprender a xogar ao xadrez correspondidos con ese libro.
Días despois fixemos o troco de libros, pero sei por Fernando, o novo monitor, que Mariña este ano non se apuntou á actividade de xadrez.

3 Comentarios:

Blogger Jan said...

De quedar co libro, igual persíase unha xadrecista e gañábase unha historiadora, quen sabe!!!

De todos os xeitos o post de hoxe 'destila' moita morriña.

UNha apreta

10:55 da tarde  
Blogger bouzafria said...

Pensándoo ben houbo sorte, mellor foi que o libro confundido fora ese en vez do da "Sexualidade feminina".

11:01 da tarde  
Anonymous Anónimo said...

Pienso que no gano el Lete feroz, que creo que se jubila este año. Perdio la universidad de Santiago que se quedo sin uno de los mejores civilistas de españa, que ahora da clases en la Universidad de Navarra

12:03 da tarde  

Enviar um comentário

<< Home